Ólafur Ragnar Grímsson

Ólafur Ragnar Grímsson, forseti Íslands 1996-2016

Ólafur Ragnar Grímsson fæddist 14. maí 1943 á Ísafirði. Foreldrar hans voru Grímur Kristgeirsson, rakari og Svanhildur Ólafsdóttir Hjartar, húsmóðir.

Ólafur Ragnar lauk stúdentsprófi frá Menntaskólanum í Reykjavík vorið 1962.

Hann stundaði nám í hagfræði og stjórnmálafræði við Háskólann í Manchester og lauk doktorsprófi í stjórnmálafræði frá sama skóla. Hann varð þar með fyrstur Íslendinga til að ljúka doktorsprófi í stjórnmálafræði. Ólafur Ragnar kenndi við Háskóla Íslands og vann frumkvöðlastarf í því að byggja upp námsbraut í stjórnmálafræði. Hann var mikilvirkur á vettvangi stjórnmála áður en hann tók við embætti forseta Íslands árið 1996.

Fyrri kona Ólafs Ragnars var Guðrún Katrín Þorbergsdóttir. Hún var fædd 14. ágúst 1934 og lést 12. október 1998. Síðari kona hans er Dorrit Moussaieff skartgripahönnuður, fædd 12. janúar 1950.

Ólafur Ragnar sat í stjórn Sambands ungra framsóknarmanna 1966-1973 og í framkvæmdastjórn Framsóknarflokksins 1971-1973. Hann sat á Alþingi sem varaþingmaður 1974 og 1975 fyrir Samtök frjálslyndra og vinstri manna og var þingmaður Reykvíkinga fyrir Alþýðubandalagið á árunum 1978-1983 og fyrir Reyknesinga 1991-1995. Hann starfaði sem ritstjóri Þjóðviljans 1983-1985 og var formaður Alþýðubandalagsins 1987-1995. Á árunum 1988-1991 var hann fjármálaráðherra í ríkisstjórn Steingríms Hermannssonar.

Hann stjórnaði á tímabili útvarps- og sjónvarpsþáttum á Ríkisútvarpinu.

Ólafur Ragnar hefur sinnt ýmsum félags- og nefndarstörfum og hann var forseti alþjóðlegu þingmannasamtakanna Parliamentarians for Global Action 1984-1990 og sat í stjórn samtakanna til ársins 1996. Einnig sat hann í stjórn friðarfrumkvæðis sex þjóðarleiðtoga 1984-1989.

Ólafur Ragnar hefur hlotið margvíslegar viðurkenningar fyrir störf sín; Friðarverðlaun Indiru Gandhi árið 1987, The Robert O. Anderson Sustainable Arctic Award frá Institute of the North í Alaska 2007, Jawaharlal Nehru Award for International Understanding sem forseti Indlands afhenti árið 2010, gullmerki American-Scandinavian Foundation 2014 og Walter J. Hickel orðuna 2015.

Ólafur Ragnar var kjörinn heiðursdoktor frá háskólanum í Ås í Noregi 1997, háskólanum í Manchester 2001, Ríkisháskólanum í Ohio árið 2009, Laval háskólanum í Québec árið 2015 og Kookmin háskólanum í Seoul árið 2015.

. . .

Heimildir

Forseti.is